Ýewropa Bileleşigine agza ýurda amala aşyran ilkinji resmi saparynyň çäklerinde Prezident Berdimuhamedow Italiýa Respublikasynyň Prezidenti Serjio Mattarella tarapyndan kabul edildi. Soňra Italiýanyň Daşary işler we halkara hyzmatdaşlyk ministrligi hem-de Italiýanyň Söwda agentligi — ICE tarapyndan guralan giň gerimli işewürlik forumy geçirildi. Oňa Daşary işler ministriniň orunbasary Jorjo Silli gatnaşdy. Forumyň dowamynda «Sistema Italia»-nyň wekilleri türkmen kärhanalary bilen duşuşyp, bar bolan gatnaşyklary berkitmegiň hem-de energetika, ulag, özara baglanyşyk, infrastruktura, dokma senagaty we oba hojalyk hem-de azyk önümçiligi pudaklarynda täze hyzmatdaşlygy ösdürmegiň mümkinçiliklerini ara alyp maslahatlaşdylar.
25-nji oktýabrda, şenbe güni Prezident Berdimuhamedow we Rim şäheriniň häkimi Roberto Gualtieri Kapitoliý muzeýlerinde «Türkmenistanyň gadymy siwilizasiýalary» atly sergini açdylar (Palazzo dei Conservatori, 2025-nji ýylyň 25-nji oktýabry — 2026-njy ýylyň 12-nji apreli). Sergide görkezilýän gymmatlyklar Margiananyň irki taryhy döwrüne (b. e. öň III–II müňýyllyklar) we gadymy Parfiýa (Nusaý, b. e. öň II asyr — b. e. I asyry) degişlidir. Şeýle möhüm taslamanyň durmuşa geçirilmegi Italiýa bilen Türkmenistanyň arasyndaky ylmy we akademiki hyzmatdaşlygyň ýokary derejesini görkezýär.
Saparyň uly üstünlik bilen geçmegi Italiýa bilen Türkmenistanyň arasyndaky gatnaşyklary ikitaraplaýyn hyzmatdaşlygyň ähli ugurlarynda täze, has ýokary derejä çykardy. Ykdysady we söwda gatnaşyklary babatda Italiýa bilen Türkmenistanyň arasyndaky hyzmatdaşlyk ep-esli ösýär we täze önümçilik pudaklaryny öz içine alýar.
Türkmenistanyň Prezidenti Serdar Berdimuhamedowyň Italiýa resmi sapary (Rim, 2025-nji ýylyň 24–25-nji oktýabry)
